ટૂંકો લેખ: વિશ્વાસ
થોડાક સમય પહેલા એક સુવાક્ય (મારા મતે નહિ) ઈન્ટરનેટ પર પ્રખ્યાત થયું તું, જેનું ગુજરાતીમાં ભાષાંતર એવું હતું કે, "જંગલનો રાજા ભલે સિંહ હશે પણ મેં કદીય શિયાળને સર્કસમાં જોયું નથી" વાક્યનો અર્થ એટલો જ હતો કે તમે શિયાળ જેવા બનો, એની વૃત્તિ લુચ્ચાઈ ભરેલ હોય, ષડયંત્ર, કાવતરામાં એ પારંગત કરાય, શિકાર કરે નહિ પણ સિંહે તરછોડેલા શિકારને ચુપકેથી ખાઈ જાય. તમે એવા બનો જેથી લોકો તમારો ફાયદો ના ઉઠાવી જાય અને તમે બીજાનો ફાયદો ઉઠાવી શકો.
વાક્ય વાંચીએ તો એવું લાગે શું વાત છે, વાત સાચી છે. બધા જ લોકો સ્વાર્થવૃત્તિથી વિચારે તો વાક્ય સો ટકા સાચું જ લાગે. પણ એનો બીજો અર્થ કોઈએ કદાચ નહિ વિચાર્યો હોય. આજ વાક્યને આપણે પોતાના સ્વાર્થ વગર વિચારીએ તો ખ્યાલ આવશે કે, "આપણે કદાચ જંગલના રાજા સિંહ પર વિશ્વાસ મૂકી શકીએ, પણ શિયાળ પર ક્યારેય નહીં"
કોઈની જોડે બોલીચાલી, ઝગડીને, કાવતરા કરીને કે કરાવીને આપણે જીતી તો શકીએ પણ સામેવાળાને મનને નહિ. સિંહને શિયાળવૃત્તિની ખબર જ હોય છે પણ એ શિયાળની જોડે પોતાની સરખામણી નથી કરતો. સિંહ જો શિયાળની ભાષા બોલે તો ગર્જના શબ્દ જે ખાલી સિંહ માટે બન્યો છે એ નામશેષ બની જાય. કાવતરા કે ષડયંત્ર કરીને તમે જીતી તો જશો પણ કોઈ વિશ્વાસ નહિ કરે. આપણે ગમે તેટલા સારા દેખાવાની, મોંઢામાંથી નરમાશ ભરેલા શબ્દો બોલવાની કોશિશ કરીએ પણ લોકો એટલાય મુરખા નથી કે સિંહ અને શિયાળ વચ્ચેનો ભેદ ના સમજી શકે. માણસ ખુદની નજરમાં ત્યારે જ જીતી શકે જ્યારે એના પર કોઈક વિશ્વાસ કરી જાય.
પહેલું વાક્ય ખૂબ સાચું લાગે પણ શિયાળ બનવા કોઈ તૈયાર થશે? કદાચ આપણું ખુદનું મન માની જાય એ વાતને કે શિયાળ જેવું બનવું જોઈએ. પણ મેં એવુંય કદી પણ નથી સાંભળ્યું કે જંગલનો રાજા શિયાળ હોય. સાહેબ સિંહ ભલે જંગલમાં હોય કે સર્કસમાં, એનો ડર બંન્ને જગ્યાએ સરખો જ રહે છે. બાળવાર્તાઓમાં હજીય જંગલનો રાજા સિંહ જ હોય છે અને શિયાળની આગળ વિશેષણ લાગીને હજીય એ 'લુચ્ચું શિયાળ' તરીકે જ ઓળખાય છે...
અંતિમ સ્પર્શ:
કાવાદાવાની રમત હારી, શ્વાસ જીતીને આવ્યો છું,
જેની જરૂર છે મનને એ વિશ્વાસ જીતીને આવ્યો છું.
- નિશાંક મોદી
No comments:
Post a Comment